سوریه کې دولتي رسنۍ وايي، دفاعي سیسټم لږ تر لږه هغه توغندي شنډ کړي چې له اسرائیلو څخه په دمشق کې د حکومت پر پوځي اهدافو توغول شوي وو.
د سوریې دولتي خبري اژانس سنا وايي چې له ځمکې څخه ځمکې ته دا توغندي د تېرې نیمې شپې پر مهال ویشتل شوي دي او مالي زیان یې اړولی دی.
د سوریې د بشري حقونو د څار ادارې ویلي، احتمالاً تېره شپه اسرائیلي توغندیو د دمشق په جنوب لوېدیځ کې د حکومت او د دوی د متحدانو اهداف ویشتي دي.
د دې ادارې مشر رامي عبدالرحمن ویلي، د دمشق په جنوب کې یوه پوځي اډه د توغندي هدف ګرځول شوې ده.
عبدالرحمن ویلي، دا روښانه نه ده چې ویشتل شوي تاسیسات د سوریې پوځ کارول او کنه، ایراني یا د لبنان شیعه ملېشې په کې وې.
ایران له خوا جوړې شوې ملېشې او د لبنان د حزب الله شیعه ملېشې په سوریه کې د بشارالاسد ملاتړ کوي.
اسرائیلو منلې چې په سوریه کې یې شپږ کاله مخکې د کورنۍ جګړې د پیل راهيسې دغلته پر ځینو اهدافو د توغندیو بریدونه کړي، څو د حزب الله ملېشو ته د وسله والو د انتقال مخه ونیسي.
حزب الله په ۲۰۰۶ میلادي کال کې له اسرائیلو سره جګړه وکړه.