د انګلستان ملکې دوهمې الیزابت او د هغې مېړه شهزاده فیلیپ د خپل واده ۷۰مه کالیزه ولمانځله.
هغوی د بریتانیې د شاهي کورنۍ لومړۍ جوړه ده چې د واده ۷۰ کلونه لمانځي.
په لندن کې د وستمنیستر ابې زنګونه پرون دوشنبه «۱۳۹۶ کال د لړم ۲۹» د ملکې او شهزاده د درناوي لپاره وکړنګېدل.
هغوی د ۱۹۴۷ میلادي کال د نومبر په ۲۰مه نېټه په وستمنیستر ابې کې واده کړی وو.
د انګلستان اوسنۍ ملکه دوهمه الیزابت په ۱۹۵۲ میلادي کال کې د هغې د پلار شپږم جورج تر مړینې وروسته، ملکه وټاکل شوه.
ملکه دوهمه الیزابت ۹۱ کلنه او شهزاده فیلیپ ۹۶ کلن دی.
هغوی څلور اولادونه لري.
ملکې اليزابت د عمر د زیاتوالي له امله خپل یو لړ مسؤلیتونه خپل زوی شهزاده چارلس ته چې ۶۹ کلن دی، سپارلي دي.
د بریتانیې صدراعظمې ترېزا مې شاهي کورنۍ ته د مبارکۍ ورکولو د رسمي مراسمو مشري وکړه.