افغان ولسمشر محمد اشرف غني پرون شپه په کابل کې له شمشاد خصوصي ټلوېزیون نه چې دوه اوونۍ مخکې پرې ډلهییز برید شوی و، ولیدل.
ولسمشر غني له شمشاد ټلوېزیون د لیدنې معلومات او عکسونه په خپله رسمي ټویټرپاڼه ټویټ کړي دي.
هغه لیکلي چې:
"نن ماښام شمشاد ټلوېزیون ته ورغلم او د دغه ټلوېزیون له کارکوونکو سره مې ولیدل. سره له دې چې په دوی وحشیانه برید شوی و، خو د خپلې دندې د مخته وړلو لپاره غښتلې اراده لري."
د عامې روغتیا وزارت د معلوماتو له مخې په شمشاد ټلوېزیون په برید کې ۳ کسان وژل شوي و او ۲۱ نور ټپیان وو.
افغان ولسمشر د شمشاد ټلوېزیون کارکوونکي د هغه څه لپاره چې ترورېستي حملو یې اراده نهده ماته کړې ستایلي دي.
داعش یا اسلامي دولت ډلې په شمشاد ټلوېزیون د برید مسؤلیت په غاړه اخیستی و.