د روسیې ولسمشر ولادیمیر پوتین پر متحدایالاتو په بالتیک سیمه کې د پوځي ځواکونو د یوځای کولو تور ولګاوه خو ویې ویل چې دا د مسکو لپاره د اندیښنې وړ خبره نهده.
پوتین په ساحلي ښار سوچي کې د روسي او نړیوالو کارپوهانو په غونډه کې د وینا پر مهال وویل، روسي چارواکي په بالتیک سیمه کې د امریکا او ناټو له پوځي تحرکاتو څخه پوره خبر دي.
متحد ایالاتو او متحدانو یې په وروستیو څو کلونو کې دې سیمې ته د زغرهوال ځواکونو یو شمېر قطعې استولي دي.
په ۲۰۱۴ میلادي کال کې له روسیې سره د کریمیا ضمیمه کول او د اوکراین په ختیځ کې د مسکو لاسوهنې د دې باعث شوې چې د بالتیک هېوادونه د روسیې د نیتونو په اړه شکمن او اندیښمن شي.
امریکايي ځواکونو د بالتیک په ځینو سیمو کې د ټانکونو او توپونو په څېر یو شمېر درنې وسلې هم ځای پرځای کړي دي.
پوتین وویل چې روسیه د لویدیځو هېوادونو پر پوځي ځواکونو څارنه کوي.