وسلهوالو طالبانو د بلخ د چمتال ولسوالۍ په جرکلا سیمه کې د سیمهییزو پولیسو پر يو شمېر پوستو حملې کړي دي.
د بلخ د پولیسو ویاند، شیر جان دُراني نن ازادي راډيو ته وویل چې په جرکلا کې د سیمهییزو پولیسو دوه پوستې وسلهوالو طالبانو نیولي دي.
د دُراني په وینا، په حمله کې د سیمهییزو پولیسو د یوه قوماندان، فدا محمد په ګډون شپږ تنه وژل شوي دي.
د بلخ د پولیسو ویاند، ازادي راډیو ته وویل چې حمله پای ته رسېدلې او د وسلهوالو طالبانو د یوې ډلګۍ مشر عبدالستار هم په حمله کې وژل شوي دې.
وسلهوالو طالبانو په دې اړه لا څه نهدي ویلي. د ازادي راډیو خبریال د امنیتي ادارو په حواله وايي چې د چمتال ولسوالۍ زیاتې سیمې د وسلهوالو طالبانو په لاس کې دي.