د افغانستان د ولسي جرګې رئیس د ولسمشر اشرف غني هغه څرګندونې چې کاندید وزیران دې د باور د رایو په بدل کې پیسې نه ورکوي، یو تور بللی دی.
عبدالروف ابراهیمي نن د دې جرګې په عمومي غونډه کې دا ډول څرګندونې مقننه قوي ته سپکاوی وباله:
"د ولسمشر او د درې ګونو قواوو د رئیس له خوا، د ملي شورا او خلکو د منتخبو استازو په اړه دا ډول څرګندونې مقننه قوي ته سپکاوی او په کمه سترګه کتل دي."
ولسمشر اشرف غني څو ورځې مخکې نویو کاندید وزیرانو ته خبرداری ورکړی و چې هر کاندید وزیر که له ولسي جرګې څخه د باور د رایو ترلاسه کولو لپاره پیسې وکاروي د کاندید وزیرانو له لېست څخه به یې وباسي.
تر دې مخکې د کابینې د یو شمېر پخوانیو وزیرانو په شمول ځینو کسانو ویلي وو چې کاندید وزیرانو ته د ولسي جرګې د غړیو له خوا د باور د رایو ورکولو پر مهال په ځینو مواردو کې د پیسو مسئله مطرح وه.