د امریکا متحدو ایالاتو پرون جمعه رسماً د ایران سپاه پاسداران ځواکونه د تروریستانو پرضد د خپلو بندیزونو په لېست کې شامل کړل.
د امریکا د خزانې وزارت پر ویب پاڼه په خپاره شوي بیان کې راغلي چې د ایران سپاه پاسداران ځواکونه د حزب الله او حماس په ګډون یوشمېر تروریستي ډلو او وسله والو طالبانو د مرستو له امله په نښه شوي دي.
د امریکا د خزانې وزارت په بیان کې ټینګار شوی چې دا اعلان په دې معنی نه دی چې امریکا د ایران سپاه پاسداران انقلاب ګارډ د بهرنیو تروریستانو په لېست کې شامل کړی دی.
د امریکا د متحدو ایالاتو ولسمشر ډونالد ټرمپ پرون جمعه د ایران لپاره د خپل حکومت پر پالیسۍ په خبرو کې وویل چې پر سپاه پاسداران انقلاب به سخت بندیزونه ولګېږي.
ډونالد ټرمپ زیاته کړه:
"زه د خزانې وزارت ته صلاحیت ورکوم چې د ایران پر ګارد سپاه پاسداران انقلاب اسلامي، د ډلې پر چارواکو، استازو او شریکانو د ترورېزم د ملاتړ له امله نور بندیزونه ولګوي."
د امریکا د خزانې وزارت په ایران کې د دریو سازمانونو نومونه هم خپاره کړي چې له سپاه پاسداران انقلاب سره تخنیکي او مالي مرستې کوي.