د مزارشریف ښاروالي هڅه کوي ترڅو د ولسمشر د حکم پر اساس، په دولتي ادارو کې د جنسیتي برابرۍ په پام کې نیولو په خاطر، یاد بنسټ کې هم زیات شمېر ښځو ته د کار کولو زمینه برابره کړي.
د مز ارشریف ښاروال محمد نصیر عیني وايي چې اوس مهال اته سلنه ښځې د بلخ د ښاروالۍ په چوکاټ کې د مامورینو او کارکوونکو په توګه دنده ترسره کوي.
د مزارشریف ښاروال وايي چې د ناحيو دوه امریتونه او د ښاروالۍ د مرستیالۍ یو بست به ښځو ته ځانګړی کړي او په خبره یې چې د ښځو د کار په پيلېدو سره د دوی د عامه خدماتو سطحه هم لوړه شوې ده.
د سې شنبې په ورځ د بلخ د ښاروالۍ په دولتي ادارو کې د جنسیتي برابرۍ د پراختیا لپاره "د دولتي ادارو په مختلفو سطوحو کې د ښځو حضور" تر نامه لاند یو پروګرام هم جوړ کړ چې پکې ډېر شمېر مدني فعالانو، د دولتي ادارو مشرانو او د خصوصي بسټونو مسؤلینو ونډه اخېستې وه.
په داسې حال کې د مزارشریف ښاروالي هڅه کوي چې د چارو د ښه ترسره کېدو او عامه خدماتو د سطحې د لوړوالي په خاطر ډېر شمېر ښځو ته په یاد دولتي بنسټ کې د کار کولو زمینه برابره کړي چې همدا اوس مهال ډېر شمېر با سواده نجونې او ښځې د کاري فرصت د نشتون له امله، له اقتصادي ننګونو سره مخ دي.