ترکیې، ایران او عراق د عراقي کردانو مشرانو ته خبر داری ورکړی چې له عراقه د کردستان د جلا کېدو په اړه ټولپوښتنې ته به ځواب ورکړي خو د متقابل اقدام جزئیات یې نه دي څرګند کړي.
د دې هېوادونو د بهرنیو چارو وزیرانو پرون چهارشنبه په نیویارک کې د ملګرو ملتونو د عمومي اسامبلې د کلنۍ غونډې په څنډه کې، سره وکتل او د عراق په کردستان کې د را روانې ټولپوښتنې په اړه یې خبرې وکړې.
له عراقه د کردستان د بشپړې خپلواکې په اړه ټولپوښتنه د را روانې دوشنبې په ورځ چې د سپټمبر پنځه ویشتمه ده، پلان شوې ده.
د ایران، عراق او ترکیې د بهرنیو چارو د وزیرانو په ګډه اعلامیه کې چې پرون خپره شوه، د عراق د خاورې پر بشپړتیا ټینګار شوی او له پلان شوې ټولپوښتنې سره مخالفت پکې څرګند شوی دی.
رپوټونه وايي چې د مسکوپولیسو زیات شمېر تاجک کارګران چې اعتراض یې کړی و، نیولي دي.
د کارګرانو یوه وکیل ویلي چې هغوي د روسیې د امنیتي ځواکونو له لوري د یوه تاجک کارګر د وهل - ټکول کېدوپر ضد اعتراض کړی و.
په روسیه کې د مهاجرو د فدراسیون مشر کرامت شریپوف ویلي چې تر دوه نیم سوه زیات تاجک کارګران نیول شوي دي.
د مسکو پولیسو نن وویل چې تر نوي زیات کسان د مسکو په یوه لوي مارکېټ کې د مهاجرو او د مارکېټ د امنیتي ساتونکو ترمنځ په نښته کې نیول شوي دي.
په مسکو کې د تاجک مهاجرو کارګرو د خدماتو د ادارې یوه ویاند نن ازادي راډیوته وویل چې پولیسو یو 27 کلن کارګر ځوان وهلی او هغه په روغتون کې بستر شوی دی.
د روغتون کارکونکو ویلي چې دا سړی نوروز کریموف نومېږي او صحي وضعیت یې نازک دی.
په روسیه کې د منځنۍ اسیا او قفقاز د هېوادونو سل ګونو زره کارګر کار کوي.