په کابل کې د ملګرو ملتو دفتر یا یوناما ژمنه وکړه چې د افغانستان د ولسي جرګې او ولسوالیو شوراګانو د انتخاباتو په مالي او تخنیکي برخو کې به مرستې وکړي.
د یوناما سیاسي مرستیالې پرنیل دهلر کاردل دا ژمنه پرون په کابل کې د انتخاباتو د خپلواک کمېسیون له لوري رابلل شوې غونډې ته وکړه.
په دې مشورتي غونډه کې د یو شمېر سیاسي ګوندونو استازیو، د مدني ټولنې غړیو او په کابل کې د یو شمېر سفارتونو استازیو ګډون کړی وو.
د یوناما سیاسي مرستیالې د را روانو انتخاباتو پر شفافیت ټینګار وکړ او ویې ویل چې ډاډمن او شفاف انتخابات یو مهم ګام دی چې افغانستان د ثبات په لوري بیایي.
تمه ده چې د افغانستان د ولسي جرګې او ولسوالیو شوراګانو انتخابات د راتلونکې لمریز کال د چنګاښ په میاشت کې ترسره شي.