د بريټانیا پولیس وايي، د لندن په مېټرو کې یې د بمي حملې په تړاو یو بل کس هم نیولی دی.
د لندن ښاري پولیسو پرون وویل چې دا کس ۲۱ کلن دی او د لندن په لویدیځ کې نیول شوی دی.
د دغه نیول شوي کس په اړه زیات معلومات نهدي ورکړل شوي.
پولیسو وروسته له هغه د یاد کس د نیولو اعلان وکړ چې مخکې یې د لندن په یوه هستوګنه سیمه سن بري کې د تلاشۍ خبره کړې وه.
د شنبې په ورځ پولیسو په دوور بندري ښار کې د لندن د میټرو د بمي حملې په تړاو یو کس نیولی و چې دا یې په دې قضیه کې مهم پرمختګ هم یاد کړ.
د جمعې په ورځ د لندن په مېټرو کې په یوه بکس کې ځای پر ځای شویو بمونو ته چاودنه ورکړل شوې وه چې ۳۰ کسان یې ټپيان کړل.
داعش د دې برید مسؤلیت په غاړه واخېست خو پولیسو دا ادعا تر اوسه نهده تائید کړې.