د روسیې د باشقېرستان جمهوریت په پلازمېنه اوفا کې یو شمېر خلکو د خپلې مورنۍ ژبې، باشقېر د رسمي مؤقف د ملاتړ لپاره لاریون وکړ.
لاریون کوونکو پرون شنبه غوښتنه وکړه چې د دې جمهوریت په ابتدائیه ښوونځیو کې باشقېر ژبه تدریس شي.
د لاریون تنظیمونکو ویلي چې تر ۲۰۰۰ زیات خلک ورغلي وو او د پولیسو تر کلکې څارنه لاندې یې د خپلې مورنۍ ژبې په ملاتړ کې غږ اوچت کړ.
د پولیسو له لوري د لاریون کوونکو د توقیف یا تشدد رپوټ لا نهدی ورکړل شوی.
ویل کېږي چې پولیسو د لاریون په پای کې له یوه تنظیمونکي غوښتنه کړې وه چې په لاریون کې د خپل رول په اړه معلومات ورکړي، خو لاریون کوونکو د دې مخنیوی وکړ او د لاریون تنظیمونکی یې د پولیسو له پوښتنو خلاص کړ.
په اوفا کې پرونی لاریون د باشقورت په نوم یوه غیر راجسټر شوي سازمان تنظیم کړی و.