د امریکا دفاع وزیر جیمز متېس وایي، افغانستان ته یې د نورو سرتېرو د استولو فرمان لاسلیک کړ.
دا په افغانستان کې د طالبانو او نورو وسله والو ډلو په وړاندې د امریکا د شپاړس کلنې جګړې د ګټلو لپاره د امریکا د ولسمشر د نوې ستراتیژۍ یوه برخه ده.
متېس د پنجشنبې په ورځ خبریالانو ته وویل چې نوي امریکايي ځواکونه به افغان ځواکونو ته دا وړتیا ورکړي چې لا اغیزمنه مبارزه وکړي.
جیمز متېس زیاتوي لا هم د هغوی د ځای پرځای کولو فرمانون نه دي بشپړ شوی.
ښاغلي متېس دا ونه ویل چې په افغانستان کې د اوسني ځواکونو پر شمېر به څومره ورزیات شي.
پنتاګون د اګست پر دېرشمه نېټه وویل چې اوس مهال په افغانستان کې شاوخوا یوولس زره امریکایي پوځیان شته.
تر دې وړاندې پنتاګون په افغانستان کې د خپلو سرتېرو شمېر ۸۴۰۰ ښودلی وو.