د قطر حکومت نن وویل چې سفیر به یې بېرته تهران ته ستون شي.
قطر تقریباً شل میاشتې مخکې خپل سفیر له تهرانه ایستلی و .
دا کار په ایران کې د سعودي عربستان پر ډیپلوماټیک ماموریت د یو شمېر اعتراض کوونکو تر حملې وروسته شوی و.
سعودي عربستان او یو شمېر نورو عربي هېوادونو له قطره غوښتنه کړې وه چې له ایران سره خپل روابط پرې کړي.
خو د قطر د بهرنیو چارو وزارت نن اعلان وکړ چې په ټولو برخو کې د ایران له اسلامي جمهوریت سره د اړیکو ټینګولو هيله لري.
د هغه وزارت په اعلامیه کې ویل شوي چې د قطر د بهرنیو چارو وزیر شیخ محمد بن عبدالرحمن الثاني په دې اړه د ایران د بهرنیو چارو له وزیر جواد ظریف سره په ټیلیفوني خبرې کړي دي.
قطر او ایران د عربو په خلیج کې د طبیعي ګاز زېرمي لري او د پاک وېش لپاره دواړه هېوادونه اړ دي چې ښه روابط ولري.