په کندهار کې زرو بېوزلو کورنیو ته د دوی د ژوند د بساینې لپاره شیدو لرونکې غواګانې وویشل شوې.
د کندهار د کرنې او مالدارۍ رئیس سید حفیظ الله سیدي نن دوشنبه ازادي راډیو ته وویل چې د دغې پروژې هدف دا دی چې حیواني محصولاتو ته بازار موندنه وکړي او د بې وزلو کورنیو اقتصاد ور سره وغوړېږي.
ښاغلي سیدي زیاته کړه:
"ګټه یې دا ده، څو بې وزلې کورنۍ خپل اقتصاد پر پښو ودروي او له دې لارې شیدې، مستې او پنېر په بازار کې وپلوروي."
د دغې پروژې لګښت نړیوال بانک ورکوي او د ودان موسسې په همکارۍ، د کندهار د مرکز په ګډون په بولدک او ډنډ ولسوالیو کې عملي کېږي.