د ترکیې ولسمشر رجب طیب اردغان نن یکشنبه سعوديعربستان، کوېټ او قطر ته دوه ورځنی سفر پیلوي.
اردغان په داسې حال کې دې سیمې ته روان دی چې د خلیج هېوادونه په خپلو اړیکو کې له بحران سره مخامخ دي.
سعوديعربستان، بحرین، مصر،متحده عربي اماراتو او یو شمېر نورو هېوادونو له قطر سره ديپلوماټيک او تجاراتي روابط پرې کړي دي.
هغوی پر قطر تور لګولی چې د اسلامپالو افراطي ډلو ملاتړ کوي او له ایران سره نېږدې اړیکي لري چې یاد هېوادونه یې د ځان رقیب ګڼي.
قطر دا تورونه ردوي.
اردغان به د سعوديعربستان له پاچا سره نن یکشنبه وګوري او بیا به کوېټ ته ولاړ شي چې په خلیج کې د بحران د حل لپاره منځګړیتوب کوي.
اردغان به سبا دوشنبه په قطر کې خلیج ته خپل دا سفر پای ته ورسوي.
په سیمه کې د روان بحران د حل لپاره هڅې چې امریکا هم پهکې شامليږي، بې نتیجې پاتې شوې دي.