په افغانستان کې له ماشومانو د ملاتړ دفتر وايي، په جګړو کې د ولسي خلکو په تېره د ماشومانو د تلفاتو لوړې شمېرې ټکان ورکوونکې دي.
د دغې ادارې لهخوا تېره ورځ په خپره شوې اعلامیه کې راغلي چې د ملکي تلفاتو په اړه د ملګرو ملتونو وروستۍ شمېرې په ډاګه کوي چې په افغانستان کې بشري وضعیت ډېر خراب دی.
د افغانستان لپاره د ملګرو ملتونو مرستندویه اداره یا یوناما د دوشنبې په ورځ په خپره شوې اعلامیه کې ویلي چې د روان کال په لومړیو شپږو میاشتو کې، په افغانستان کې ۱۶۶۲ ملکي کسان وژل شوي چې دوه سلنه ډېروالی ښيي او ۳۵۸۱ نور بیا ټپیان دي.
د ماشومانو د ملاتړ دفتر «سېف دې چلډرن» په اعلامیه کې همدا شان په جګړه کې د ملکي، په ځانګړي توګه د ماشومانو مرګ ژوبله غندل شوې او له ښکېلو خواو غوښتل شوي چې د ماشومانو ساتنې ته لومړیتوب ورکړي.