د ناټو عمومي منشي ینس سټولټنبرګ نن پنجشنبه وویل چې د تړون غړو موافقه وکړه چې افغانستان ته نور عسکر ورواستوي.
دا عسکر به د سټولټنبرګ په وینا، د افغانستان د امنیتي ځواکونو په روزنه کې مرسته کوي.
سټولټنبرګ نن سهار وویل:
"زموږ پوځي چارواکو په افغانستان کې د مأموریت لپاره د څو زرو اضافي عسکرو غوښتنه کړې وه او نن زه دا تائيدولی شم چې موږ به په افغانستان کې خپل حضور پراخوو. ۱۵ هېوادونو له دې مأموریت سره د همکارۍ ژمنه کړې او زه د نورو هېوادونو تعهدونو ته سترګې په لار یم."
د افغانستان د ولسمشر مرستیال ویاند دوا خان مینهپال نن ازادي راډیوته وویل چې د بروکسل له غونډې تمه لري چې د ناټو غړي به کلک او دوامدار ملاتړ اعلان کړي.
د بریتانیې حکومت ژمنه کړې چې سل نور عسکر به افغانستان ته واستوي.
خو د ناټو عمومي منشي، ینس سټولټنبرګ نن وویل چې د نورو عسکرو د استولو معنی دا نهده چې د ناټو عسکر به بیا په افغانستان کې له وسلهوالو طالبانو او نورو افراطي ډلو سره په جګړه کې ګډون کوي.
ناټو خپل پوځي ځواک تقریباً دوه کاله مخکې له افغانستانه وایست.