د لوي کندهار دځوانانو شورا له حکومته غواړي چې په هلمند کې د وروستۍ تروریستي حملې په اړه جدي څېړنه وکړي او پایلي یې له ولس سره شریکي کړې.
د لوي کندهار د ځوانانو شورا به نن شنبه په دې اړه په غونډه کې چې د مدني ټولنې او د بشري حقونو د ملاتړ د یو شمېر ادارو استازي وربلل شوي، په هلمند کې د وروستۍ چاودنې پرسیاسي او امنیتي اړخونو خبرې وکړي.
د دې شورا لومړي مرستیال عبدالله مصباح ازادي راډیو ته وویل:
"موږ وړاندیز کړی چې د دې مسئلې د روښانتیا لپاره، که چېري د تحقیقاتو هیئت تعینېږي، باید لږترلږه د مدني ټولنې د همږغۍ مرکز، د افغان کلتوري ټولنو ګډې شورا، ملي محور، د لوی کندهار د ځوانانو شورا، د لوي کندهار د مشرانو شورا او د فکري مرکز استازي پکې شامل شي څو پایلو ته ورسېږو، هرڅوک چې ګرم وي، باید مجازات شي اوکه داسې ونه شي نو موږ به هم د افغانستان د ولس په څېر چې په نورو پېښو کې بې باوره شوی، اعتماد وبایلو."
په لښکرګاه کې د پنجشنبې په ورځ دکابل بانک دفتر ته مخامخ چاودنه وشوه.
د هلمند چارواکي وايي چې ۳۸تنه وژل شوي او تر ۶۰زیات زخمیان شوي دي.
خو ویل کېږي چې دا شمېر ښايي بدل شي.
د حملې مسئولیت وسله والو طالبانو اخیستی دی.