د کندز ولایت امنیتي چارواکي په دغه ولایت کې د ځانوژونکي برید په تور د یوه ۱۱ کلن ماشوم د نیول کېدو خبر ورکوي.
د دغه ولایت امنیه قوماندان جنرال عبدالحمید حمیدي له رسنیو سره د خبرو پر مهال وویل چې دغه ماشوم عصمتالله نومېږې او د میدان وردګو ولایت اوسېدونکی دی چې څه موده وړاندې د کندز امام صاحب ولسوالۍ ته د ديني زدهکړو په خاطر راغلی و.
د کندز امنیه قوماندان جنرال عبدالحمید حمیدي
ښاغلي حمیدي زیاته کړه:
"د عصمتالله په نوم دغه ماشوم د امام صاحب ولسوالۍ د ځنګله په سیمه کې په ديني مدرسه کې زدهکړې کولې، خو په مدرسه کې د ښوونکي لهخوا ورته د ترورېستیي برېدونو او د ځانوژونکو حملو په برخه کې روزنه ورکړل شوې ده او دغه ماشومیې ځانوژونکي برید ته چمتو کړی و، خو دغه کوچني له مدرسې څخه تېښته کړې او د کندز ښار د کابل بندر په سیمه کې د پولیسو منګولو ته ورغلی دی."
ښاغلي حمیدي زیاته کړه چې نوموړي ماشوم ته د کندز په امام صاحب ولسوالۍ کې د مولوي نصرالدین مشهور په ذکي لهخوا مدرسه کې د ځانوژونکي برید روزنه ورکړل شوې ده.
جنرال حمیدي وویل:
"په دشت ارچي او امام صاحب ولسوالیو کې د طالبانو یو دوه روزنیز مرکزونه موجود وو، خو هغه د هوايي بریدونو په پایله کې لهمنځه ولاړل، خو دوی د اسلام او شرعیت له نوم څخه ناوړه ګټه اخلي او په مدرسو کې ماشومانو ته د ترورېستي حملو په برخه کې روزنه ورکوي، خو که بیا دغه مدرسې ویشتل کېږي، نو بیا خلک شور ماشور کوي چې تاسې دیني مدرسې په توپونو ولئ."
په ورته وخت کې دغه ماشوم خپل نوم عصمتالله او د پلار نومیې ناصر ښیي او ځان د ميدان وردګو ولایت د سیداباد ولسوالۍ د حزبالدین کلي اصلي اوسېدونکی معرفي کوي او وايي چې دی د خپلو دوو وروڼو سره د کندز امام صاحب ولسوالۍ ته د دیني زدهګړو په خاطر راغلي وو، خو په مدرسه کې ده ته د ښوونکي لهخوا د ترورېستي برېدونو او ځانوژونکو حملو په برخه کې روزنه ورکول کېده.
دی وایي:
"زه خپلو وروڼو سره امام صاحب ولسوالۍ ته د دیني زدهکړو په خاطر راغلی وم، نو بیا مولوي ذکي راته روزنه راکوله او زما په ژبهیې پېچکاري راولګوله او بیا یې زما په کچه د انتحاري حملې واسګټ راته جوړ کړی و او مولوي ذکي راته وویل چې زه سبا تا انتحاري حملې ته بیایم او د پولیسو پر حوزې باندې انتحاري حمله وکړه او مړ به شې، لاړ به شې جنت ته، هلته ګلان او باغچې دي."
عصمتالله زیاتوي، ده ته په مدرسه کې ښوونکي ویلي وو چې دولتي ځواکونه ټول کافران دي، تاسې پر هغوی باندې ځانوژونکي برېدونه وکړئ او ځانونه شهیدان کړئ.
عصمتالله وایي:
"موږ تهیې تربیه راکوله چې دولتي ځواکونه کافران دي، هغوی لمونځونه نهکوي، ظالمان خلک دي او تاسې ورشئ، پرې برېدونه وکړئ او جنت وګټئ او طالبانو ښایسته ښایسته هلکان د شپې لهخوا ځانونو سره بيول او هر کار بهیې ورسره کاوه، وسلې بهیې پر موږ پاکولې او هر کار بهیې پر موږ کاوه."
له دې وړاندې د کندز امنیتي چارواکو ویلي وو چې د دې ولایت په یو شمېر ولسوالیو کې وسلهوالو مخالفینو خپل روزنيز مرکزونه جوړ کړي او هلته پهکې ځوانانو ته د ځانوژونکو او ترهګریزو حملو په برخه کې روزنه ورکول کېږي.
د یادونې وړ ده، دا لومړی ځل نهدی چې په کندز کې ماشومان د ترورېستي او ځانوژونکو حملو په تړاو نيول کېږي، لهدې وړاندې هم د کندز امنیتي ارګانونو یو شمېر د کم عمر لرونکي زلمي د بېلابېلو ترهګریزو برېدونو په تړاو نيولي وو.
خو وسلهوالو طالبانو تر اوسه په دې اړه څه نهدي ویلي.
راپور: اجمل ارین.