د ارزګان ولایت سیمهييز امنیتي چارواکي وايي، تېره ورځ يې د دغه ولایت په مرکز ترینکوټ کې د عملیاتو پر مهال د دوه طالب قوماندانانو په ګډون ۲۳ وسلهوال طالبان وژلي دي.
د دغه ولایت د امنیت امر عبدالقوي عمري نن سې شنبه ازادي راډیو ته وویل چې تېره ورځ يې د ارزګان ولایت مرکز ترینکوټ شمال لور ته د افغان ګډو ځواکونو له لوري ځمکني او هوايي عملیات ترسره کړي چې پر مهال يې ۸ وسلهوال طالبان وژل شوي او یو شمېر نور ټپيان دي خو نوموړي د خپل لوري په اړه څه ونه ویل.
ښاغلي عمري زیاته کړه چې د یادو عملیاتو پر مهال یې یو کیلومتر سیمه هم له وسلهوالو طالبانو څخه تصفیه کړې.
له دې سره په دغه ولایت کې د ملي پولیسو د لومړي کنډ ملک زینالله ازادي راډيو ته وویل، تېره شپه افغان کمانډو او بهرنیو ځواکونو په ګډه د ارزګان مرکز ترینکوټ اړونده ناکیله نومې سیمه کې د وسلهوالو طالبانو پر مرکزونو چاپې وهلي چې پر مهال يې د دوه طالب قوماندانانو په ګډون ۱۵وسلهوال طالبان وژل شوي او۱۰ نور ټپيان دي.
وسلهوالو طالبانو تراوسه په دې اړه څه نهدي ویلي.