اجرائیه رئیس عبدالله عبدالله هیله ښيي چې د کابل د دوو لوړپوړو امنیتي چارواکو د دندې تر ځنډولو وروسته به په ښار کې د ځینو معترضینو تحصن ختم شي.
د افغانستان لویې څارنوالۍ پرون یکشنبه د کابل د ګارنېزیون عمومي قوماندان جنرال ګلنبي احمدزي او د کابل امنیه قوماندان جنرال حسنشاه فروغ دندې وځنډولې.
ښاغلي عبدالله نن دوشنبه د وزیرانو شورا د اوونیزې غونډې په پیل کې دا هم وویل چې په کابل کې د وروستیو پېښو په اړه تحقیقات روان دي.
نوموړي زیاته کړه:
"د افغانستان لویې څارنوالۍ پرون پرېکړه وکړه چې د تحقیقاتو د بېطرفۍ د خوندیتوب لپاره د کابل د دوو امنیتي پوځي چارواکو دندې وځنډوي، د تحقیقاتو نتایجو ته په کتو به بیا نورې پرېکړې ونیول شي."
د کابل د دوو لوړپوړو امنیتي مقاماتو د دندې له ځنډولو جمهوري ریاست هم هرکلی کړی و.
د لویې څارنوالۍ ویاند جمشید رسولي پرون په یوه خبري غونډه کې ټینګار وکړ چې د جنرال ګلنبي احمدزي او جنرال حسنشاه فروغ دندې د کابل د وروستیو پېښو په تړاو تر یو لړ څېړنو وروسته ځنډول شوې دي.