کابل سبا سې شنبه د «کابل پروسې» د نړیوالې ناستې کوربه دی.
د افغانستان د بهرنیو چارو وزارت وايي چې د امنیت ټینګښت او د ترهګرۍ پر وړاندې رښتینې مبارزه او د سولې ټینګښت او د افغان حکومت لیدلوری د دغې ناستې د اجنډا د بحث وړ مسایل دي.
د افغانستان د بهرنیو چارو وزارت ویاند شکیب مستغني د دوشنبې په ورځ په کابل کې یوې خبري غونډې ته د خبرو پر مهال هیله څرګنده کړه چې د ناستې ګډون کوونکي به د ترهګرۍ سره د مبارزې په برخه کې له افغان حکومت سره هم نظره وي.
ښاغلي مستغني وویل:
"د کابل د کنفرانس عمده دلیل دا دی چې په افغانستان کې سوله د یوې با ثباتې سیمې لپاره مهمه اړتیا ده، د دغې ناستې هدف دغهشان د ترهګرۍ پر وړاندې د مبارزې او په افغانستان کې د سولې د ټینګښت لپاره د څرګندو ژمنو په تړاو د یوې واحدې اجماع رامنځته کول دي."
د بهرنیو چارو وزارت وايي چې د «کابل پروسې» په ناسته کې د سیمې او نړۍ ۲۴ هېوادونه او دغهشان درې نړیوال سازمانونه، ناټو، ملګري ملتونه او اروپايي ټولنه ګډون کوي.
د ښاغلي مستغني په خبره، په دغې ناسته کې به له هغو هېوادونو عملي ژمنې واخیستل شي، کوم چې د سولې د ټینګښت برخه کې د کابل د پروسې د عملي اقداماتو غوښتونکي دي.
د ولسمشرۍ ماڼۍ د ویاند دفتر سرپرست شاه حسین مرتضوي او د اجرائیه ریاست مرستیال ویاند جاوید فیصل هم چې په یاده خبري غونډه کې یې ګډون کړی و، وویل چې حکومت په دغې ناستې کې د یوې سیمهییزې او تر هغې هم د پراخې اجماع د رامنځته کولو هڅه کوي.
تر دې مخکې هم د افغانستان د سولې په اړه ګڼې ناستې جوړې شوي، خو د چارو د شنونکو په وینا چندان نتیجهیې نهده ورکړې.
کارپوهان په دې باور دي چې په افغانستان کې د سولې راوستل د پاکستان په لاس کې دی، خو د دوی په وینا، دغه هېواد لا په دې برخه کې اقدام نهدی کړی.
د نړیوالو اړیکو کارپوه ودیر صافی وايي، دغه ناسته په داسې حال کې ترسره کېږي چې په افغانستان کې دننه سیاسي جریانونه له حکومت سره په تقابل کې دي.
د نوموړي په خبره، دغه ناسته به تر ډېره د ورستیو جنجالونو تر اغېز لاندې وي.
ودیر صافی
ودیر صافي زیاته کړه:
"په افغانستان کې دننه وضعیت به دغه ناسته تر خپل اغېز لاندې راولي، بلخوا د حکومت بېکفایتي هم ښايي د دې لامل شي چې نړیواله ټولنه همکارۍ ته زړه ښه نهکړي."
نوموړی حکومت ته وړاندیز کوي چې د افغانستان د کورني وضعیت په اړه خپلو نړیوالو همکارانو ته ډاډ ورکړي او د دې تر څنګ دې د دغه هېواد په چارو کې د پاکستان د لاسوهنو ټول شواهد هم له ګډون کوونکو سره شریک کړي.
راپور: اجمل تورمان