د افغانستان د ولسي جرګې د دوشنبې د ورځې غونډه د کابل د وروستیو پېښو څرنګوالي او له هغو څخه د راولاړو شویو ستونزو هواري ته ځانګړې شوې وه.
په دغې غونډه کې له اوږدو بحثونو وروسته د ولسي جرګې مشر عبدالرؤف ابراهيمي د وکیلانو په تائید پرېکړه وکړه چې د چهارشنبې، جمعې او شنبې د ورځې د پېښو د څېړلو لپاره به د ولسي جرګې پلاوی یوه طرحه جوړوي.
نوموړي وویل چې یاده طرحه به وروسته له حکومت، معترضینو، په کابل کې د امریکا سفارت، یوناما یا په افغانستان کې د ملګرو ملتونو د مرستندویه مأموریت دفتر او اروپايي ټولنې سره شریکوي، تر څو دغې ستونزې ته د حل لاره پیدا شي.
ولسي جرګې همدارنګه پرېکړه کړې چې په دغه پلاوي کې به د هر ولایت یو یو وکیل ګډون لري.
دا پرېکړه وروسته له هغه کېږي چې د کابل د چهارشنبې ورځې په خونړۍ حمله کې شااوخوا سل کسان ووژل شول او څه د پاسه څلور سوه نور ژوبل شول.
خو بلخوا د ولسي جرګې د نن ورځې په غونډه کې ځينو وکیلانو وویل چې مظاهره د خلکو قانوني حق دی او د معترضینو مشروع غوښتنو ته باید رسیدهګي وشي.
د حکومت پر ضد اعتراضونه وروسته له هغه دوامداره شول چې د چهارشنبې ورځې د خونړۍ حملې په وړاندې په کابل کې مظاهرې په تشدد واوښتې او له اعتراضونو وروسته د تشدد په پېښو کې یو شمېر کسان ووژل شول.