افغان حکومت د بريتانیا منچسټر ښار کې د تېرې شپې د برید د غندلو تر څنګ دا يو بزدلانه عمل بللی دی.
ولسمشرۍ ماڼۍ د يوې اعلامیې په خپرولو سره د بریتانیا د خلکو سره د غم شریکۍ اظهار کړی دی.
په ورته وخت کې د حکومت د اجرائیه ریاست مرستیال ویاند جاوید فیصل ازادي راډیو ته وویل چې د اروپا او امریکا په زړه کې دا شان بریدونه نړۍ د ترورېزم سره جدي مبارزې ته رابولي.
ښاغلي فیصل زیاته کړه:
"له دغې پېښې وروسته يو ځل بیا د دې اړتیا احساسوو چې نړۍ باید د ترورېزم سره په ګډه مبارزه وکړي څو ترهګري لهمنځه ولاړه شي او موږ ټول په سوله کې ژوند وکړو."
ښاغلي فیصل وویل چې د افغانستان حکومت د ترورېزم سره د اغېزمنې مبارزې لپاره پر نړيوالې اجماع ټینګار کوي.
د بريتانیا د منچسټر په ښار کې تېر ماخوستن لس بجې او ۳۵ دقیقې یوه چاودنه وشوه چې ۲۲ کسهیې ووژل او ۵۰ نور یې ټپیان کړل.
دا چاودنه د امریکايي پاپ سندرغاړې اریانا ګراندې په کنسرت کې وشوه.