د عدالت نړیوالې محکمې (ای سي جې) په پاکستان امر وکړ چې د هند سمندري ځواکونو پخوانی افسر دې اعدام نه کړي.
دا پرېکړه یادې محکمې نن غرمه مهال وکړه.
د عدالت نړیوالې محکمې د کولبوشان یادف د اعدام د ځنډولو په خاطر د هند تر غوښتنې وروسته دا پرېکړه کړې ده.
پاکستان ویلي، کولبوشان یادف د جاسوسۍ په تور تېرکال په بلوچستان ایالت کې نیول شوی دی.
خو نوې ډهلي ویلي کولبوشان یادف جاسوسي نه کوله او د بند پرمهال ورته د وکیل د نیولو یا سلا مشورې حق نه دی ورکړل شوی.
په کولبوشان یادف د جاسوسۍ او له ترورېزم د ملاتړ تور پورې دی او د پاکستان یوې پوځي محکمې په اعدام محکوم کړی دی.
د کولبوشان یادف په اړه د پاکستان د پوځي محکمې تر پرېکړې وروسته د دغو دوو ګاونډيو خو سیالو هېوادونو تر منځ اړیکې لاخرابې شوې.