په خوست کې یو شمېر مدني فعالان، د سولې شورا غړي او د بېلابېلو ټولنیزو سازمانونو استازي د سولې په ټېنګښت کې د ځوانانو ونډه مهمه بولي او وايي چې اوسنیو مثبتو ذهنېتونو ته په کتو، ځوانان باید د دې بهیر د بریالیتوب لپاره خپلې هڅې پراخې او چټکې کړي.
دوی چې د دوشنبې په ورځ "په سوله کې د ځوانانو ونډه" تر سرلیک لاندې په یوه یو ورځني سیمینار کې راټول شوي وو، وویل چې ځوانان کولای شي د ټولنیزې ميډیا، رسنیو، هنر، سپورټ او نورو ټولنیزو فعالیتونو او ازادو بحثونو له لارې خلک د سولې لپاره یو موټی کړي.
یاد سیمینار چې د ټولنیز، فرهنګي، پوهاوي او بیارغونې بنسټ په نوښت جوړ شوي و، د سازمان یوه استازي سپین روان نورزی وویل، د دا ډول پروګرامونو څخه يې هدف دا دی، تر څو هغه ځوانان چې په ورانکارو کړنو بوخت دي، سولهییز ژوند ته راوګرځي.
یاده دې چې څه موده مخکې افغان ولسمشر په ارګ کې د حزب اسلامي د مشر د ښه راغلاست غونډې ته ویلي وو چې د هغه په راتګ سره د افغان حکومت له لوري د سولې د زمینو په خاطر یو سترګام پورته شوی دی.