د روسیې ولسمشرۍ ماڼۍ کرملېن د امریکا د جمهور رئیس ډونالد ټرمپ او د روسیې د بهرنیو چارو د وزیر سرګي لاوروف د خبرو په اړه محتاطانه خوشبیني ښودلې ده.
د کرملېن ویاند دیمیتری پېسکوف نن وویل د دواړو هېوادونو په وړاندې زیات کارونه پراته دي.
د پېسکوف په خبره په جرمني کې د «G-۲۰» هېوادونو غونډه به د ډونالد ټرمپ او ولادیمیر پوتین تر منځ د مخامخ خبرو ښه فرصت وي.
د امریکا متحده ایالاتو جمهور رئیس ډونالد ټرمپ او د روسیې د بهرنیو چارو وزیر سرګي لاوروف پرون سره وکتل.
ولسمشر ټرمپ له سرګي لاوروف سره خبرې ښې وارزولې او په سوریه کې یې د ترورېستانو د لهمنځه وړلو لپاره د ګډې همکارۍ په خاطر هيلهمندي وښوده.
روسیه د سوریې د رژیم ملاتړې ده.