په بلخ کې د قرهقل پوستکي د پروسس او صادراتو انسټټیوت وايي چې سږ کال به څه باندې درې لکه جلده د قرهقل پوستکي منځنۍ آسیا او فنلنډ ته صادر شي.
د دغه انسټټیوټ مالي او اداري مدیر محمد عارف د دوشنبې په ورځ ازادي راډیو ته وویل چې اوسمهال ۴۵ زره جلده د قرهقل پوستکي د پروسس لاندې دي او د تېر کال په نسبت به څو برابره زیات بهر ته صادر شي.
نوموړی وایي چې په ۱۳۹۶ لمریز کال کې په بلخ ولایت کې قرهقل پوستکي ډېر خرڅلاو لري.
ښاغلی محمد عارف وايي چې تېر کال یو لک ۸۷۵۳۱ جلده قرهقل پوستکي بهر ته صادر شوي وو.
نوموړی وایي، د افغاني قرهقل یو جلد پوستکی په نړیوالو بازارونو کې له ۵۰ تر ۷۰ ډالرو پلورل کېږي.
قرهقل پوستکی چې د افغانستان مهم پیداوار یادېږي، د اوږدې مودې راهیسې په نړیوالو بازارونو کې د افغان صادراتو عمده برخه تشکیلوي.