د ناروې د کډوالو شورا " Norwegian Refugee Council" د افغانستان پر حکومت او وسلهوالو طالبانو غږ کړی چې د کندز د قلعهزال ولسوالۍ خلکو ته د جګړې له سیمې د وتلو لار ورکړي.
د دې ادارې مشر پرون یکشنبه کندز کې په روانه جګړه کې له ښکېلو خواوو وغوښتل چې د ملکي خلکو امنیت او ژوند ته پام وکړي.
وسلهوالو طالبانو د شنبې په ورځ پر قلعهزال حمله وکړه او تر څو ساعتونو جګړې وروسته د ولسوالۍ د مرکز په ګډون زیاتې سیمې يې ونیولې.
دې نړېوالې ادارې د قلعهزال د اوسېدونکو په حواله خبر ورکړی چې د کندز د بلې ولسوالۍ خاناباد خلک هم د جګړې له وېرې په تېښته کې دي.
د ناروې د مهاجرت شورا وايي چې له قلعهزال او خاناباد ولسوالیو زرګونه کسان تښتېدلي او د کندز نورو سیمو تهیې پناه وړې ده.
دې ادارې ویلي چې د جګړې له امله له بېځایه شویو خلکو سره بېړنیو مرستو ته تیاری نیسي.
د افغانستان حکومت وايي چې د قلعهزال ولسوالۍ د بېرته نیولو لپاره عملیات روان دي او اضافي ځواک سیمې ته استول شوی دی.