د ایران د بهرنیو چارو وزیر وايي، هېواد یې له افغانستان سره د ترورېزم او نشهیي توکو په وړاندې په ګډه مبارزه کې همکاري کوي.
جواد ظریف چې نن د یکشنبې په ورځ کابل ته راغلی وو، د افغانستان د بهرنیو چارو له وزیر صلاحالدین رباني سره په یوه ګډه خبري غونډه کې وویل، کابل او تهران د همکاریو ګڼ فرصتونه لري.
جواد ظریف زیاته کړه:
"موږ اړتیا لرو چې د ترور، تاوتریخوالي او نشهیي توکو په وړاندې ګډه همکاري او مقابله وکړو او دغه همکاري د افغانستان، ایران، سیمې او نړۍ په ګټه ده."
د افغانستان د بهرنیو چارو وزیر صلاحالدین رباني په دغې خبري ناسته کې وویل، ترورېزم او افراطیت د دواړو هېوادونو او نړۍ امنیت ګواښي.
ښاغلي رباني زیاته کړه، د ایران او افغانستان ټینګار دا دی چې اسلامي سازمان او اسلامۍ نړۍ باید د افراطیت پر وړاندې ګډه مبارزه وکړي.
د افغانستان د بهرنیو چارو وزیر زیاته کړه، له ایراني سیال سرهیې د ترورېزم او نشهیي توکو سره د مبارزې برسېره، د دواړو هېوادونو پر اقتصادي او ټرانزیټي اړیکو هم بحثونه کړي دي.