د ایران ولسمشر حسن روحاني ایرانیانو ته خبرداری ورکړ چې که د ده سیالو سخت دریځو تهیې رأی ورکړې، په هېواد کې به پراخ استبداد راولي.
په همدې حال کې د روحاني اصلي سيال ولسمشر په خپلو اقتصادي پالېسیو کې ناکام وباله.
روحاني او سیالیې ابراهیم رئيسي له ټلوېزیوني مناظرې یوه ورځ وروسته پرون د شنبې په ورځ په جلا جلا غونډو کې خپلو پلویانو ته ویناوې وکړې.
روحاني چې هڅه کوي د دوهمې څلور کلنې دورې لپاره ولسمشر شي، په یزد ښار کې د خپلو پلویانو په غونډه کې وویل، موږ به دوی پرېنهږدو چې د امنیتي کسانو او پولیسو ماحول بیا واکمن کړي.
روحاني زیاته کړه، ایرانیان به نړیوالو ته د مې د ۱۹مې په ټاکنو کې ثابته کړي چې په ایران کې د تشدد، افراطیت او فشار دور پای ته رسېدلی او ایران د منطق پر لار روان دی.
روحاني په ټلوېزیوني مناظره کې ویلي وو چې د ایرانیانو لپاره د ازادۍ مسئله خورا مهمه ده.
رئیسي چې یو سختدریځی ملا او د ایران له مذهبي مشر ايتالله علي خامنهاي سره نېږدې دی او دغهشان د تهران ښاروال محمد باقر قالیباف، د روحاني اصلي سیالان ګڼل کېږي.
رئیسي د تهران په لوبغالي کې خپلو پلویانو ته د وینا پر مهال پر روحاني د هېواد د اقتصادي وضعیت په خاطر انتقادونه وکړل.