د ایران سترې محکمې پر یوې ایرانيالاصلې بریتانوۍ د پنځه کاله بند حکم پرځای ساتلی او د دې پرېکړې د بدلولو لپاره د نوموړې غوښتنه یې رد کړې ده.
نازنین زاغري راټکلیف چې د ټامسن رویټرز د خیریه بنسټ منېجره وه د ایران ملي امنیت ته د ګواښ په تور محاکمه او په پنځه کاله بند محکومه شوه.
د ایراني رسنیو د راپورونو له مخې نازنین د ۲۰۰۹ مېلادي کال د ولسمشرۍ په انتخاباتو کې د محمود احمدي نژاد له بیا غوره کېدو وروسته د سولهییزو مظاهرو له لارې د اخندي نظام د پرځولو په مقصد د دسیسو په جوړولو تورنه شوې ده.
نوموړې چې یو کال مخکې د خپلې کورنۍ د لیدو لپاره ایران ته تللې وه، د تهران په هوايي ډګر کې د سپاه پاسدران د انقلابي ځواک لهخوا په داسې حال کې ونیول شوه چې له خپلې دوه کلنې لور سره یوځای بېرته برتانیا ته ستنېده.
د نازنین مېړه ریچارډ راټکلیف پرون وویل، سترې محکمې ته مراجعه د دې حکم په وړاندې د دوی وروستی قانوني فرصت و.
نوموړي وویل، د محکمې پرېکړې د ده مېرمن په غوسه کړې ده؛ خو حیرانه کړې یې نه ده.