د ترکيې پوځ وايي، هوايي ځواکيې په عراق او سوریه کې هغه سیمې بمبار کړي چې کُرد وسلهوال ترې ترکيې ته د وسلو د انتقال لپاره استفاده کوي.
د ترکيې پوځ د سې شنبې په ورځ په یوې اعلامیه کې وویل، د عراق په سنجار سیمه کې يې د کُردانو د کارګر ګوند او د سوريې په شمال ختیځ کې يې د «وای. جي. پي» په نامه د کُرد وسلهوالو موضعګانې ویشتلې دي.
ترکیه، متحده ایالات او اروپايي ټولنه د کُردانو کارګر ګوند یا «پې. کې. کې» یوه ترورېستي ډله ګڼي.
د کُردانو د کارګر ګوند وسلهوالو د عراق په سنجار سیمه کې وروسته تر هغې خپل حضور او فعالیت پراخ کړ چې دغلتهيې د داعش لهخوا د یزیدي اقلیت پر وړاندې د زور زیاتي د مخنیوي لپاره ځانونه ورسول.
داعش د ۲۰۱۴ میلادي کال په اوړي په سنجار کې د مېشتو یزیدیانو پر ضد له تاوتریخوالي او زرو زیاتي کار واخېست.
د ترکيې د پوځ یوه لوړ رتبه قوماندان جنرال سیمي بوسالي ویلي په سنجار سیمې د دوی په هوايي برید کې د کُردانو د پېشمګره ملېشه ځواک پنځه وسلهوال وژل شوي دي.
د ازادي رادیو د خبر مرکزي څانګې په وینا دا لومړی ځل دی چې ترکیه د عراق په سنجار سیمه کې پر کُرد وسلهوالو برید کوي.
د ترکيې پوځ په تازه بمبارۍ کې د کُرد وسلهوالو یوه بله ډله «وای. جي. پي» هم په نښه کړې ده.
متحده ایالات له «وای. جي. پي» یا د کُردانو د ډموکراتیک ځواکه ملاتړ کوي او دا ډله د سوريې په شمال کې د داعش پر ضد جګړه کې مخکښ ځمکنی ځواګ ګڼل کېږي.
د سوريې د بشري حقونو ډله چې له لندن څخه فعالیت کوي وايي چې د ترکيې د هوايي برید په نتیجه کې د «وای. جي. پي» وسلهوالو درې غړي وژل شوي دي.
د کُرد وسلهوالو «وای. جي. پي» ډلې په یوه بیان کې ویلي ترکي الوتکو د دوی یوه راډیو او مخابراتي او پوځي تأسیسات په نښه کړي دي.