په ترکیه کې د اروپا د انتخاباتي څارنې د مأموریت شورا یوې غړې ویلي چې د ترکیې په ټولپوښتنه کې ښايي په دوه نیم میلیونه رأیو کې لاسوهنه شوې وي.
دا ټولپوښتنه چې له مخې یې ولسمشر رجب طیب اردوغان کولای شي تر ۲۰۲۹ میلادي کال پورې واک کې پاتې شي، پهکې د موافقو او مخالفو رأیو توپیر کم و.
د اتریش د پارلمان غړې الیف کورَن چې د اروپايي شورا د پارلماني اسامبلۍ د څارنې د مأموریت غړې هم ده، وايي په ترکیه کې د اپرېل د ۱۶مې نېټې د ټولپوښتنې په رأیو کې ممکنه لاسوهنې د اردوغان د بریالیتوب چانس تقریباً دوه چنده زیات کړ.
له "او. ار. اېف" په نوم راډیو سره مرکه کې کورَن همدارنګه وویل چې د حقیقي رأیو د شمېر په اړه هم پوښتنې راپورته شوي، دا ځکه چې د ترکیې قانون یوازې په رسمي پاکټونو کې رأیې مني، خو لوړپوړو چارواکو که څه هم د قانون خلاف و، پرېکړه وکړه چې د رأیو هغه پاکټونه هم مني چې رسمي مهر ونهلري.
د اروپا د امنیت او همکارۍ سازمان چې د ترکیې په دې ټول پوښتنه کې یې د څارنې جلا مأموریت ترسره کاوه هم ویلي چې انقره ورسره د رأیو په اړه درغلیو د ادعاو په څېړنه کې همکاري نهکوي.
د ترکیې مهم اپوزېسیون ګوند د ټول پوښتنې د نتایجو د باطلېدو غوښتنه کړې او په دې توګهیې د ترکیې د صدراعظم هغه غوښتنه رد کړې چې له ټولو سیاسي لورو یې غوښتي، څو د دې لانجمنې ټولپوښتنې نتایج ومني.