د افغانستان د کورنیو چارو وزیر تاج محمد جاهد وايي، فاریاب ته د سفر په ترڅ کې به له سیمهییزو چارواکو سره په ګډه په دې ولایت کې د امنیتي وضعیت د ښه کېدو پر لارو چارو غور وکړي.
ښاغلي جاهد چې د سې شنبې په ورځ د کورنیو چارو وزارت د یوه پلاوي په مشرۍ د فاریاب مرکز میمنې ته ورسېد، خبریالانو تهیې د خپل سفر د هدف په اړه وویل:
"زموږ د سفر هدف دا دی چې د کورنیو چارو وزارت د رئیسانو د یوه ټیم سره د فاریاب ولایت د امنیتي او عمومي وضعیت د ارزولو لپاره راغلي یوو، دلته له ولایتي چارواکو، قومي مشرانو او دیني عالمانو سره ګورو او د خپلو پولیسو د پیاوړتیا پر لارو چارو کار کوو."
د افغانستان د کورنیو چارو وزیر هیله څرګنده کړه چې فاریاب ته بهیې سفر په دې ولایت کې د امنیتي وضعیت د ښه کېدو سبب شي.
د کورنیو چارو د وزیر په مشرۍ دغه لوړپوړي دولتي هیئت په داسې حال کې فاریاب ته سفر کوي چې د دې ولایت اوسېدونکي وايي، په وروستیو دوو میاشتو کې دغلته ګوندي اختلافات له یوې خوا او د حکومت د وسلهوالو مخالفینو فعالیتونه له بلېخوا د نا امنیو د زیاتېدو سبب شوي دي.