ولسمشر غني اسټرالیا، اندنیزیا او سنګاپور ته له سفر وروسته نن سهار بېرته هېواد ته راستون شو.
ارګ ماڼۍ د یوې خبرپاڼې په خپرولو سره ویلي چې ښاغلی غني د دغه سفر په ترڅ کې د درې واړو هېوادونو له چارواکو او سوداګرو سره جلا جلا کتنې درلودې او په اقتصادي، پراختیایي او په افغانستان کې یې د شته فرصتونو په اړه له هغوی سره خبرې کړې دي.
په خبرپاڼه کې راغلي چې د افغانستان او دغو دریو هېوادونو ترمنځ په بېلابېلو برخو کې هوکړه لیکونه هم شوي دي.
خبرپاڼه د ولسمشر غني له قوله وايي چې د افغانستان حکومت به د ملي او نړیوالو سوداګرو لپاره په بېلابېلو برخو کې اسانتیاوې برابرې کړي.