ولسي جرګه افغانستان کې د دغه هېواد لهخوا د امریکايي ځواکونو د ډېرېدو له غوښتنې وروسته وايي چې د ترورېزم سره د مبارزې لپاره غوره لار د افغان امنیتي ځواکونو تجهیز او ملاتړ دی.
د دغه جرګې لومړي مرستیال همایون همایون د پنجشنبې په ورځ ازادي راډیو ته وویل چې د تېرو کلونو تجربې ښيي چې افغانستان کې د بهرنیو ځواکونو زیاتېدل د دغه هېواد روانه جګړه نهشي کابو کولای.
نوموړی وايي:
"تېرو څو کلونو کې ګڼ شمېر بهرني ځواکونه افغانستان کې مېشت وو خو له بدهمرغه چې د جګړې په ختمولو بریالي نهشول نو په دې اساس زموږ ټینګار د افغان امنیتي ځواکونو په تجهیز، تمویل او روزنه کې ده چې د جګړې مخه ونیسي."
ښاغلی همایون وايي، له مخالفینو سره سولې هم ځکه نتیجه نهده ورکړې چې واګې يې د وسلهوالو مخالفینو د ملاتړ کوونکو په لاس کې دي.
دا په داسې حال کې ده چې د افغانستان د بهرنیو چارو وزیر واشنګټن کې د اتلانتیک شورا په کنفرانس کې د امریکا متحده ایالاتونو څخه غوښتي چې په افغانستان کې د تروریستي ډلو او داعش سره د مقابلې لپاره افغانستان کې د امریکايي ځواکونو شمېر ډېر کړي.
جنرال نیکلسن هم تېره میاشت د امریکا کانګرس ته ویلي و چې د افغانستان د روانو په ټپه ولاړو حالاتو د ماتولو لپاره څو زره اضافي سرتېرو ته اړتیا ده.
اوس مهال ۸۴۰۰ امریکايي سرتېري په افغانستان کې ځای پرځای دي.
د افغانستان د بهرنیو چارو وزیر وویل، افغانستان بېلابېلو برخو کې د امریکا مرستو ته اړتیا لري.
د هغه په خبره د نظامي وسایلو د کمښت پوره کول، د هوايي او ځمکنیو ځواکونو د وړتیاو لوړول، د پوځیانو روزنه او د استخباراتي برخې څخه د امریکا ملاتړ ته اړتیا لیدل کېږي.
تر دې دمه واشنګټن افغانستان ته د نورو سرتېرو د استولو په اړه لا څه نهدي ویلي.
په ورته وخت کې د نظامي چارو یو شمېر کارپوهان وايي، د پوځیانو په ډېرولو سره حالات بدلون نهشي موندلای.
مېرزا محمد یارمند ازادي راډيو ته وویل چې لومړی باید پر پاکستان نړیوال فشار راوړل شي او وروسته دې پولي کنټرول کړل شي.
مېرزا محمد یارمند
نوموړی وايي:
"د افغانستان جنګ د ځواکونو په زیاتولو سره نه کابو کېږي بلکه دغه جنګ د دقیقو لارو چارو چې له لارې یې په پاکستان فشار زیات کړای شي څو رښتیني مبارزې ته حاضر شي همدارنګه د پولو دقیق کنټرول ته هم اړتیا ده."
ښاغلي یارمند دغه شان وویل چې د حکومت د سیاسي مشرانو ترمنځ باید اختلافات پای ته ورسول شي او د دښمن په وړاندې دې نظامي سیاست همغږی شي.
دی د امریکا د متحده ایالاتو مرسته مهمه ګڼي خو وايي چې باید د افغانستان وسلهوال ځواکونه له اوسني حالته هم زیات تجهیز او پیاوړي شي.
راپور : محمد واصل وصال