د ملګرو ملتونو د بشري حقونو کمېشنرې په یوه راپور کې وویل چې د ۲۰۱۴ میلادي کال د اپرېل له نیمايي څخه تر اوسه پورې د اوکراین د ختیځ په شخړو کې شااوخوا ۱۰ زره تنه وژل شوي دي.
په دې راپور کې چې پرون چهارشنبه خپور شو، ویل شوي چې د اوکراین او روسي پلوو بېلتون غوښتونکو تر منځ د ۲۰۱۴ میلادي له اپرېله د ۲۰۱۷ میلادي د مارچ تر ۱۲مې پورې لږ تر لږه ۹ زره ۹۴۰ تنه وژل شوي او لږ تر لږه ۲۳ زره ۴۵۵ نور ژوبل شوي دي.
د ملګرو ملتونو د بشري حقونو کمېشنرې دا هم ویلي چې د مرګ ژوبلو د شمېر په اټکل کې یې له محافظه کارۍ کار اخیستی دی.
راپور وايي، په دې شمېره کې د اوکراین وسلهوال ځواکونه، ملکیان، او د وسلهوالو ډلو غړي شامل دي.
تر ۲ زره ډېر ملکیان وژل شوي او د ۷ زره او ۹ زره تر منځ ژوبل شوي دي.