ټاکل شوې ده چې د افغانستان ملي امنیت سلاکار حنیف اتمر سبا پنجشنبه په یو درې ورځني سفر مسکو ته ورسېږي.
د افغانستان د ملي امنیت شورا ویاند تواب غورځنګ ازادي راډیو ته په دې اړه وویل چې ښاغلی اتمر به په لندن کې د پاکستان، افغانستان او بریتانیا په درې اړخیزه غونډه کې له ګډون وروسته مسکو ته ولاړ شي.
ښاغلي غورځنګ زیاته کړه:
"د افغانستان د ملي امنیت سلاکار به د مارچ په ۱۶مه نېټه، د روسیې له سیاسي او امنیتي چارواکو سره د خبرو اترو په هدف له پلازمېنې لندنه مسکو ته ولاړ شي."
ښاغلي اتمر مسکو ته د خپل روسي سیال په بلنه سفر کوي.
ښاغلي غورځنګ وویل چې دې سفر کې به ښاغلی اتمر د روسیې د دفاع او بهرنیو چارو له وزیرانو سره هم په دوه اړخیزو مسئلو خبرې وکړي.