د هالنډ بلوا ضد پوليسو د ترکيې د ولسمشر رجب طيب اردوغان د سلګونو پلويانو د لاريون د تيت و پرک کولو هڅه وکړه چې په روتردام کې د ترکيې د قونسلګرۍ مخې ته راټول شوي وو.
مظاهرهچیان په دغه ځای کې د ترکیې د ولسمشر رجب طیب اردوغان د ملاتړ لپاره راټول شوي وو.
د ترکيې او هالنډ تر منځ کړکېچ وروسته له هغې زيات شو چې هالنډي چارواکو د ترکيې د دوو وزيرانو مخه ونيوله چې غوښتليې په يوه لاريون کې برخه واخلي.
دغه لاريون د ولسمشر طيب اردوغان د صلاحيتونو زياتېدو په هدف د يوې ټولپوښتنې په ملاتړ رابلل شوى و.
په پام کې ده دا ټولپوښتنه بله مياشت وشي.
په وزيرانو کې يو هم د کورنيو او ټولنيزو سياستونو وزيره فاطمه بتول سايان کايا وه.
د ترکیې د کورنيو او ټولنيزو سياسيتونو وزيره فاطمه بتول سايان کايا.
هغې د يکشنبې په ورځ په استانبول کې يوه کنفرانس ته وويل:
"موږ د هالنډ پوليسو لهخوا له موټرو وايستل شوو او د جرمني سرحد ته نېږدې د پوليسو يوه مرکز ته بوتلل شو، يونيم ساعت په دغه مرکز کې توقيف وو، ډېر تريخ او بد چلند راسره وشو."
د هالنډ حکومت دغهراز د ترکيې د بهرنيو چارو د وزير مولود چاووش اوغلو الوتکې ته هم په هالنډ کې د ناستې اجازه ورنهکړه.
په انقره کې د ترکيې صدراعظم بن علي يیلدريم نن وويل، ترکيه به په شديده توګه د دې اقدام غچ واخلي.
د هالنډ صدراعظم مارک روتي ويلي پر ده فشار راوستل شوى و، څو په هالنډ کې د ترکيې د دوو وزيرانو د کمپاين مخه ونيسي، ځکه انقره د ده د حکومت په وړاندې د بنديزونو خبردارى ورکړى دى.
اردوغان پرون شنبه، له دې امله چې جرمني په هغه هېواد کې د ترکانو کمپاین بند کړ، پر جرمني تور پورې کړ چې د "نازیانو" په څېر چلند کوي.
دا په یوه اوونۍ کې دوهم وار دی چې د ترکیې ولسمشر رجب طیب اردوغان د یوه اروپايي هېواد او ناټو د غړي په اړه په وینا کې د نازیانو یادونه کوي.
د هالنډ صدراعظم مارک روتي په تازه څرګندونو کې د هالنډ په اړه د ترکیې د ولسمشر خبرې لېونډوله او له چوکاټه وتلې بللې دي.
دی وايي:
"موږ هالنډ ته د سفر په اړه د ترکیې له چارواکو سره خبرې کړې وې، موږ هغوی ته وویل چې له داسې کتنې سره موافقه نهلرو ځکه دا د ترکیې یو وزیر دی او فکر نهکوو چې د ترکیې وزیرانو ته به مناسبه وي چې د هالنډ په خلکو کې چې ښايي د ترکیې پاسپورټونه ولري، د هالنډ په خاوره کې کمپاین وکړي."
د ترکيې او اروپايي ټولنې تر منځ اړيکې په وروستيو مياشتو کې ترينګلې شوې دي.