د امريکا متحدو ايالتونو د ملي امنيت سلاکار پرون ماښام له ولسمشر محمد اشرف غني سره د افغانستان او سيمې پر امنيتي وضعيت خبرې وکړې.
د جمهوري رياست مرستيال وياند شاه حسين مرتضوي تېره شپه ازادي راډيو ته وويل چې د امريکا د ملي امنيت سلاکار هربرت ريموند مک ماسټر «Herbert Raymond McMaster» او ولسمشر غني په دې ټليفوني مکالمه کې د تروريزم په وړاندې پر مبارزې هم بحث وکړ:
"دواړه لوريو په دې ټليفوني تماس کې د افغانستان او سيمې پر وضعيت، د تروريزم په وړاندې پر مبارزه، د افغانستان پر څلور کلن امنيتي پلان او د دغه هېواد پر پارلماني انتخاباتو چې راتلونکى کال کېږي، بحث او د نظرونو تبادله وکړه."
ښاغلى مک ماسټر د تېرې ميلادي مياشتې په وروستيو کې د امريکا د ملي امنيت د سلاکار په توګه وټاکل شو.
دى چې د امريکا يو باتجربه جنرال ګڼل کېږي، په افغانستان کې يې هم دنده ترسره کړې ده.