د تورخم لار لا هم د افغانانو پر مخ تړلې ده.
سره له دې چې پاکستاني چارواکو په هغه هېواد کې د افغانستان سفیر ته ویلي چې د تورخم او سپین بولدک لارې به په نېږدې وخت کې د افغانانو پرمخ پرانیستل شي، د ننګرهار د والي ویاند وايي چې لږ تر لږه په تورخم کې وضعیت لا نهدی بدل شوی.
عطالله خوګیاڼي پرون شنبه ازادي راډیو ته وویل:
"متأسفانه تر اوسه پورې پاکستاني منصوبین نهدي ژمن شوي چې خپله وعده پوره کړي، لار تر اوسه هم د مسافرینو پر مخ تړلې ده."
پاکستاني پولیسو پرون لږ تر لږه ۲۵۰ افغانانو ته چې له وېزو سره په پاکستان کې بند پاتې وو یا ناروغان وو د سفر اجازه ورکړه.
په پاکستان کې تر یو لړ ترورېستي حملو وروسته، اسلاماباد څه باندې یوه اوونۍ مخکې له افغانستان سره د تورخم او سپین بولدک لارې بندې کړې.