د نشهيي موادو او جرمونو پر ضد د ملګرو ملتونو ادارې "UNODC" په افغانستان کې د کرېسټال ډوله مصنوعي نشهيي موادو د کارونکو د زیاتېدو په اړه خبرداری ورکړی.
په یو راپور کې چې د سې شنبې په ورځ خپور شو ملګرو ملتونو ویلي، کرېسټال ډوله مصنوعي نشهيي مواد چې په عام ډول په "شیشه" مشهور دي په دې وروستیو کې د امنیتي ادارو لهخوا په پراخه پیمانه نیول کېږي.
دا په افغانستان کې د مصنوعي نشهيي موادو په اړه د ملګرونو ملتونو د نشهيي موادو او جرمونو ادارې دا ډول لومړنۍ ارزونه ده او پهکې ویل شوي، داسې شواهد شته چې کرېسټال ډوله مصنوعي نشهيي مواد په خپله په افغانستان کې جوړېږي.
ملګري ملتونه وايي، تر اته میاشتنې ارزونې وروسته ورته څرګنده شوې چې کرېسټال ډوله نشهيي موادو کارول افغانستان کې د معتادینو تر منځ چې لا دمخه د ټولنې زیان منونکې برخه ده له یوې ورځې بلې ته پراخېږي.
د ملګرو ملتونو د نشهيي موادو او جرمونو د ادارې د عامه اړیکو مسؤل جین لوک لیماهیو "Jean-Luc Lemahieu" وايي، د دې راپور د چمتو کولو لپاره د افغانستان په پنځو ولایتونو کې د نشهيي موادو له روږدو کسانو، امنیتي چارواکو، حکومتي چارواکو او د معتادینو د درملنې له مرکزونو سره مرکې شوې دي.
په راپور کې ویل شوي چې د کرېسټال ډوله مصنوعي نشهيي موادو د هغو کارونکو شمېر چې د درملنې لپاره راجستر شوي د کندز او نیمروز په ولایتونو کې زیات وو.
د ملګرو ملتونو په دې راپور کې همدارنګه موندل شوي چې د نشهيي موادو د کنټرول په ملي قانون کې د هیروئینو او کوکاینو په مقایسه د کرېسټال ډوله مصنوعي نشهيي موادو کاروباریانو ته ډېره کمه سزا په پام کې نیول شوې.