د هلمند ولایت مرکز لښکرګاه په دوهمه او درېیمه امنیتي حوزه کې د افغان ځواکونو او د دولت د وسلهوالو مخالفینو تر منځ جګړو زور اخیستی دی.
په سیمه کې د ازادي راډیو خبریال د امنیتي چارواکو په حواله وايي چې د دوشنبې په شپه هم په درېیمه حوزه کې سخته جګړه وشوه چې لږ تر لږه دوه سرحدي سرتېري پهکې وژل شوي دي.
د لښکرګاه په لوېدیځ کې په بشران سیمه کې د سرحدي ځواکونو د څلورمې لوا مشر سمونوال ظاهر ګل مقبل ازادي راډیو ته وویل، دغلته جګړه ځکه اوږده شوه چې وسلهوال د خلکو په کورونو کې پټېږي.
په بشران کې ځای پر ځای د ملي امنیت ځانګړي سرتېري، اردو او سرحدي پولیس بیا وايي چې د وسلهوالو پر ضد د تهاجمي عملیاتو لپاره پوره چمتو دي خو مشرانو يې ورته د جنګ قومانده نهده کړې.
په همدې حال کې په هلمند کې د اوپراتیفي ډلې مشر عبدالجبار قهرمان وايي چې افغان ځواکونه دا توان لري چې د وسلهوالو فعالیتونه شنډ کړي خو د نوموړي په وینا وسلهوالو له عامو خلکو د سپر په توګه کار اخلي او همدې ته په پام د دوی عملیات په احتیاط او ورو پر مخ ځي.