د سپینې ماڼۍ یوه لوړ رتبه مقام د امریکا د فډرال محکمې پر هغو قاضیانو سخت انتقادونه وکړل چې د کډوالو په اړه يې د ولسمشر ډونالډ ټرمپ د اجرائیوي فرمان د عملي کېدو مخه نيولې ده.
پر عدلي او قضايي سیسټم د سپینې ماڼۍ د لوړ رتبه سلاکار سټیفن میلر
"Stephen Miller" پرونى انتقاد، د امریکا د نوي ولسمشر ډونالډ ټرمپ د ادارې د انتقادونو تازه لړۍ ده.
ښاغلي مېلر پرون وويل:
"نتيجه به دا وي چې زموږ مخالفان، رسنۍ او ټوله نړۍ به وګوري چې موږ به نور اقدامات پيل کړو. زموږ د هېواد د خونديتوب لپاره د ولسمشر صلاحيتونه ډېر د پام دي او تر پوښتنې لاندې به رانشي."
تېره اونۍ يوې استيناف محکمې د ډونالډ ټرمپ د اجرائیوي فرمان د نه عملي کېدو په اړه د امریکا د ابتدايه محکمې د حکم ملاتړ وکړ.
د امريکا د ولسمشر اجرائيوي فرمان امريکا ته د اوو عمدتاً اسلامي هېوادونو د اتباعو او ټولو کډوالو پر تګ د لنډې مودې لپاره بنديز لګوي.