ولسمشر ډونالد ټرمپ د امریکا د عدلیې وزارت سرپرسته وروسته له هغه له کاره لیرې کړه چې هغې د اوو اسلامي هېوادونو پر وګړو د سفر د مؤقت بندیز د مشروعیت په اړه شک څرګند کړ او ویېویل چې په محکمه کې بهیې دفاع ونهکړي.
ټرمپ تېره شپه ناوخته د لویې څارنوالۍ سرپرسته سالي یاتیس «Sally Yates» په خیانت او د غیر قانوني کډوالو په مسئله کې په کمزورۍ تورنه کړه ویېویل چې پر ځای بهیې د وېرجینیا د ختیځې ولسوالۍ څارنواله وګوماري.
مېرمن یاتیس پخواني ولسمشر بارک اوباما د لویې څارنوال د مرستیالې په توګه غوره کړې وه او تمه کېده چې په سنا کې د نوي لوی څارنوال د رأیې اخیستو تر وخته به د لویې څارنوالۍ د سرپرستې په توګه کار ته دوام ورکړي.
تمه ده چې د لوی څارنوال د څوکۍ لپاره د ټرمپ کاندید جف سیشنز به ډېر ژر د سنا تائید ترلاسه کړي.
مېرمن یاتیس د اوو اسلامي هېوادونو پر اتباعو د سفر د بندیز په اړه په داسې حال کې اندېښنه ښودلې چې د امریکا په واشنګټن ایالت کې مسلمانانو او د مدني حقونو فعالانو د ټرمپ د وروستي اجرائیه فرمان په وړاندې په محکمه کې حقوقي دعوه کړې ده.