د افغانستان لویه څارنوالۍ وايي، کشفي ادارې باید د ولسمشر د لومړي مرستیال د نهو ساتونکو په اړه د دوی حکم ژر تر ژره عملي کړي.
لويې څارنوالۍ د جوزجان له پخواني والي احمد ایشچي سره د ناوړه چلند د ادعاوو پر اساس، د دې کسانو د توقیف پرېکړه پرون اعلان کړه.
د ښاغلي دوستم دفتر په دې اړه تبصره نهده کړې.
د لویې څارنوالۍ ویاند جمشید رسولي د دې کسانو د نومونو له څرګندولو ډډه وکړه.
هغه پرون سې شنبه ازادي راډیو ته وویل:
"هیله لرو چې کشفي ادارې به ډېر ژر زموږ قرار ترسره کړي او د دې مسئلې په اړه به لازم اجرأت وکړي."
د جوزجان پخواني والي احمد ایشچې څو میاشتې مخکې د ولسمشر پر لومړي مرستیال او د هغه پر یو شمېر ساتونکو تور پورې کړی چې زور زیاتی یې ورسره کړی دی.
خو د ښاغلي دوستم د دفتر رئیس عنایتالله بابر فرهمند د احمد اېشچي ادعا بېاساسه بللې ده.