ولسمشر محمد اشرف غني وايي، ټينګه اراده لري چې د امیر امانالله خان او محمد موسی شفیق لهخوا پیل شوی فصل بیا ناتمامه پاتې نهشي.
اشرف غني وايي چې له ګاونډيو هېوادونو سره د وخت د صدراعظم محمد موسی شفیق د معاهدو تطبیق د ده یو مهم کار دی.
ښاغلي غني د سې شنبې په ورځ کابل کې د موسی شفیق د زوکړې، کړنو او شخصیت د ۹۰مې کلیزې په ویاړ جوړ شوي سیمینار ته په خپلو خبرو کې هغه د خارقالعاده پوهې څښتن او اتل وباله ویېویل چې هغه د افغانانو په ګټه د اوبو د انسجام لپاره د پام وړ کار کړی دی.
ولسمشر وايي، د ایران سره د هلمند د اوبو په سر معاهده او د ګاونډيو سره د ګډو ګټو پر بنسټ اړیکې چې موسی شفیق ورته ډېر څه کړي د افغانانانو لپاره خورا ارزښمنتنې دي.
ښاغلی غني وايي:
"موږ ته د شهید شفیق تر ټولو مهم پیغام د نیمګړي فصل بشپړول دي چې له امانالله خانه پیل شو او ده ورته دوام ورکړ، نن واضح او ټینګه اراده لرو چې افغانستان د بیا ځل لپاره نیمګړی فصل ونهلري، پرمختګ او دوامداره ثبات ته ورسېږي چې هم زموږ د خلکو اړتیاوې پوره وي او هم د سیمې د ثبات لامل شي."
د افغانستان پخواني صدراعظم او د بهرنیو چارو وزیر محمد موسی شفیق د ۱۳۰۸ لمریز کال د جوزا د میاشتې په ۵ نېټه د ننګرهار ولایت په کامې ولسوالۍ کې زېرېږیدلی، وروستهیې خپلې زدهکړې په افغانستان، د مصر په الازهر او امریکايي پوهنتونونو کې بشپړې کړي.
هېواد ته له راتګ سره د کابل پوهنتون د حقوقو په پوهنځي کې یې د استاد په حیث کار پیل کړ، د عدليې وزارت تر مرستیالی ورسېد او بیا په ۱۳۵۰ کال کې د بهرنیو چارو وزیر وټاکل شو.
هغه د افغانستان د ډموکراسۍ د لسیزې وروستی صدراعظم و چې په ۱۳۵۱ کال کې ورته د محمد ظاهر شاه لهخوا دا مسؤلیت وسپارل شو.
هغه په خپل وخت کې د هلمند د اوبو په سر د ایران سره له کلونو پاتې لانجه حل کړه چې د تاریخ لیکونکو په باور د افغانانو ګټې یې په ښه توګه خوندي وساتلې.
موسی شفیق د هلمند د اوبو په سر د ایران سره له کلونو پاتې لانجه حل کړه
ښاغلي شفیق په وچه کې د افغانستان ایسارتوب د افغانستان د پرمختګ په وړاندې خنډ باله او په دې باور و چې د افغانستان لپاره بېطرفه سیاست تر ټولو ښه تګلاره ده.
ولسمشر غني وايي چې دی ټينګه اراده لري چې دا معاهده او د ښاغلي شفیق لهخوا پاتې نور کارونه تطبیق کړي، هغه کارونه چې پهکې د افغانانو خورا ګټې نغښتي دي.
د ډموکراسۍ د لسیزې وروستی دا صدراعظم د ۱۳۵۷ کال د ثور له کودتا وروسته بندي شو او د همدې کال د ثور د میاشتې په ۲۴مه نېټه ووژل شو.
د محمد موسی شفیق لمسی ببرک دقیق شفیق وايي چې نیکهیې تل د افغانستان د پرمختګ په فکر کې و او ۳۷ کاله وروسته د هغه یاد لمانځنې یې کورنۍ خوشحاله کړې ده.
ښاغلي دقیق زیاته کړه:
"زما د شهید بابا تګلاره نه شرقي وه نه غربي وه، دا تګلاره یوه سوچه افغاني او روښانه اسلامي وه، د ازاد، اباد او ښېرازه افغانستان لپاره له افغاني غرور څخه ډکه، د درو او دښتو څخه تېره د پرمختګ داسې بام ته خېژي چې په نړیوالو غږ وکړای شي چې زما افغانستان د امن سمبول دی."
رباني:ښاغلي شفیق د افغانستان په ولسواکی کې ځانګړی رول لوبولی
د شفیق د یاد په خاطر دا نړیوال سیمینار د بهرنیو چارو وزارت د ستوري په ماڼۍ کې چېرته چې ده د ایران سره د اوبو لانجه وروستۍ کړې وه، جوړ شوی دی.
د افغانستان د بهرنیو چارو سلب صلاحیت شوي وزیر صلاحالدین رباني دې غونډې ته وویل چې ښاغلي شفیق د افغانستان په ولسواکۍ کې ځانګړی رول لوبولی دی.
راپور: یوسف خان ځدراڼ