په ایران کې نن د دې هېواد د پخواني ولسمشر علي اکبر هاشمي رفسنجاني په مړینه درې ورځنی ملي ماتم پیل شو.
رفسنجاني پرون د زړه د حملې له کبله د ۸۲ کلونو په عمر مړ شو.
د ایران اوسني ولسمشر حسن روحاني او نورو لوړپوړو ایراني چارواکو نن په تهران کې رفسنجاني ته وروستی درناوی وړاندې کړ.
هاشمي رفسنجاني له ۱۹۸۹ میلادي کال څخه تر ۱۹۹۷ م کال پورې د ایران ولسمشر و.
تمه کېږي چې د نوموړي د تدفین مراسم به سبا ترسره شي.
په همدې خاطر سبا ته په ایران کې عمومي رخصتي اعلان شوې ده.
رفسنجاني په یو "عملي محافظه کار" مشهور و چې غوښتل یې له لوېدیځ او ایران اړیکې بهتره شي.